ಆತಂಕ

ಒಮ್ಮೆಗೇ ಆಗಸ ಕಚ್ಚಿದ ಗುಡುಗುಡು ಮುಗಿಲು
ಫಳ್ಳನೆ ಮಿಂಚುವ ಮಿಂಚು
ಪ್ರಬುದ್ಧ ಮಳೆ ತೊನೆಯುತ್ತ
ಇಳೆಗೆ ಇಳಿಯುವ ಕುರುಹು

ನೆಲದ ಮೈತುಂಬ ಸಂಭ್ರಮ ಕಾತರ.
ಎಂದಿನದೇ ತೊಯ್ಯುವಿಕೆ
ಮರಳಿ ಸುರಿಯುವದೆಂದು
ಬಿಸಿಲು ಕಾರುವ ಹಸಿರು ಹೊಳಪು ಸಸಿಗಳಿಗೆಲ್ಲ
ಒನಪು ವೈಯಾರ

ಪುಳಕಿತ ಸ್ನಾನಕ್ಕಾಗಿ
ಮಮ್ಮಲ ತುಡಿಯುತ್ತಿರುವ
ಹೂ ಜಿಗ್ಗು ಮಣ್ಣು ಮೊಳೆತ ಗರಿಕೆಗಳ
ಮಿರಿಮಿರಿವ ಕಣದಲ್ಲು ಬಿರಿಬಿರಿವ ಮನದಲ್ಲು
ಸಂದಿಗೊಂದಿಗಳಲ್ಲು
ಕಚಗುಳಿಯ ಮೈ ಬೆವರು.
ಹಾಲಿನ ಹಾಡಿನ ಜತೆಗೆ ಸಂತಸದ ಹೊಗರು
ಹೂ ಬಿಲ್ಲು ಚುಂಬನದ
ಸವಿಯ ರೋಮಾಂಚನಕ್ಕಾಗಿ
ಹಸಿರುಗಳ ಒಕ್ಕೊರಲ ಜೀವಂತ ಕಾದಾಟ
ಆ ತನಕ ಆತಂಕ
ಆದರೆ
ಇನ್ನೂ ತಿಂಗಳು ತುಂಬದ ಹೊಸ
ಹೊಚ್ಚ ಸಸಿಗಳಿಗೆ ಹಸಿ ಹುಲ್ಲು ಮರಿಗಳಿಗೆ
ಹಸಿರುಗಟ್ಟುತ್ತಿರುವ
ಎಳೆ ಪಾಚಿಗರಿಗಳಿಗೆ ಮಾತ್ರ
ಎಲ್ಲವೂ ಅನಿರೀಕ್ಷಿತ
ಹೆದರುಗಟ್ಟುವ ಬೆವರು.
ಒಳಗೊಳಗೇ ನಡುಕ.
ಮಾತ್ರ ಕಣ್ಣು ಪಿಳುಕಿಸುತಿರುವ
ಚಿಗಿತ ಎಳೆ ಸಸಿಗಳಿಗೆ
ಹೊಸತೊಂದೆ ಅನುಭವದ ಬದ್ಧ ಕಾತರಿಕೆ
ಅಪ್ರಬುದ್ಧ ತಿಳುವಳಿಕೆ
ಏನೋ ಆಗಬಾರದ್ದು ಆಗಿ ಹೋಗಲಿರುವುದ
ಥರಗುಟ್ಟುವ ಮುಗಿಲು
ಮೈಮೇಲೆರಗುವುದ
ನೆನೆದೇ ಮೈ ಮುರಿ ಚೂಪು

ಕೊನೆಗೊಮ್ಮೆ
ಪುಟಪುಟಿಸಿ ಪುಳಕಿತ ಧಾರಾವರ್ಷ
ಹೂ ಎಸಳು ತಿಳು ಮೊಗ್ಗು ಚಿಗುರುಗಳ ತೊಯ್ಸುತ್ತ
ಪರಿಮಳದ ತಂಪನ್ನು ಕರಡುತ್ತ ಹರಡುತ್ತ
ಗಳಗಳಿಸಿ ಇಳಿದಾಗ

ಓರೆಕೋರೆಗಳಲ್ಲಿ ಮಡುವುಗಟ್ಟುವ ಹರುಷ
ಎಲ್ಲೆಲ್ಲು ನಿಟ್ಟುಸಿರು ತಂಪು ಸ್ಪರ್ಶ
ಮತ್ತು….. ಮತ್ತು…..
ನೆಲೆ ನಿಂತ ನೀರಿಂದ ಹೊರಗೆ ಚಿಮ್ಮುತ್ತಿರುವ
ಏನೋ ಸಹಿಸಿದೆನೆಂಬ
ಏನೋ ಸಹಿಸುವೆನೆಂಬ
ಪುಟಾಣಿ ಹಸಿರು ತಲೆಗಳ ಖುಷಿ
ಮುದ್ದು ಧಿಮಾಕು
*****