ಮೂಲ: ರೂಮಿ – ಪರ್ಷಿಯನ್ ಸೂಫಿ ಕವಿ
ಪ್ರೇಮಜ್ಞಾನದಲ್ಲಿಲ್ಲ, ವಿಜ್ಞಾನದಲ್ಲಿಲ್ಲ
ಪಂಡಿತರ ತಾಳೆಗರಿ ಹಾಳೆಗಳಲ್ಲಿಲ್ಲ
ಕಾಡು ಹರಟೆಯಲ್ಲಂತೂ ಖಂಡಿತಾ ಇಲ್ಲ
ಇವೆಲ್ಲ ನಲ್ಮೆಯ ನಿವಾಸವಲ್ಲ
ಕಾಲ ಪೂರ್ವದ ಕಾಂಡದಾಚೆಗೆ ಪ್ರೇಮದ ಕೊಂಬೆ ರೆಂಬೆ
ಬೇರುಗಳೆಲ್ಲ ಕಾಲೋತ್ತರದಂಚಿನಾಚೆ
ಈ ಮರದ ಎಲೆ ಧರೆಯಲ್ಲಿಲ್ಲ. ದೇವಲೋಕದಲ್ಲಿಲ್ಲ
ಇಲ್ಲಿ ಬರಿಯ ಕಾಲ್ಗಳಲ್ಲದೆ ಬೇರೆ ಇನ್ನೇನಿಲ್ಲ
ವಿಚಾರವಸ್ತ್ರ ಬಿಚ್ಚಿ ಎಸೆದಾಯ್ತು, ಅನುರಾಗವಿಲೀನ
ತರ್ಕದ ರೂಢಿಯಾಚೆಗೆ ಪ್ರೇಮದ ದಿವ್ಯ ಘನತೆಯ ಯಾನ
ಬಯಕೆ ನಿನ್ನಲ್ಲಿ ತುಂಬಿರುವ ತನಕ
ಆ ಆಸೆಗೆ ಮೂರ್ತಿಯಾಗಿ ಬರುವ ತನಕ
ನಲ್ಲ ನಲ್ಲೆಯರ ಭಿನ್ನ ಸ್ಥಿತಿಯಳಿದಾಗ
ಬಯಕೆ ಬೇರಾಗಿ ಇರುವುದೇ ಇಲ್ಲ
ಭಯ ಭರವಸೆಗಳ ಅಟ್ಟದ ಮೇಲೆ ನಾವಿಕನ ಸ್ಥಾನ
ನಾವಿಕನ ನಿರ್ನಾಮ, ಸಂತರ ಜಲಸಮಾಧಿ ಯಾನ
ಶಂಸ್, ನೀನೇ ಕಡಲು, ಕಡಲಾಳದ ಮುತ್ತು
ಈ ನಿನ್ನ ಭಾವ, ಜೀವ
ಕರ್ತಾರನ ಕಮ್ಮಟದ ದೊಡ್ಡ
ಗುಟ್ಟಲ್ಲದೆ ನೀನು ಬೇರೆ ನಲ್ಲ ಶಂಸ್
*****