ರಾಗ — ಕಾಂಬೋದಿ
ತಾಳ — ಅಟ್ಟ
ಮರ ನುಂಗುವ ಪಕ್ಷಿ ಮನೆಯೊಳಗೆ ಬಂದಿದೆ – ಇದರ |
ಕುರುಹ ಪೇಳಿ ಕುಳೀತಿದ್ದ ಜನರು ||ಪ||
ಒಂಟಿಕೊಂಬಿನ ಪಕ್ಷಿ ಒಡಲೊಳಗೆ ಕರುಳಿಲ್ಲ |
ಗಂಟಲು ಮೂರುಂಟು ಮೂಗಿಲ್ಲವು ||
ಕುಂಟಮನುಜನಂತೆ ಕುಳಿತಿಹುದು ಮನೆಯೊಳಗೆ |
ಎಂಟುಹತ್ತರ ಅನ್ನವನು ಭಕ್ಷಿಸುವುದು ||೧||
ನುಡಿಯುತಲುಂಬುದು ನಡುನೆತ್ತಿಯಲಿ ಬಾಯಿ |
ಕಡುನಾದದ ಗಾಯನ ಮಾಡುತಿಹುದು ||
ಅಡವಿಯೊಲು ಹುಟ್ಟುವುದು ಅಗಲಿ ಎರಡಾಗುವುದು |
ಬಡತನವು ಬಂದರೆ ಬಹಳ ರಕ್ಷಿಪುದು ||೨||
ಕಂಜವದನೆಯರ ಕರದಿ ನಲಿದಾಡುವುದು |
ಎಂಜಲು ತಿನಿಸುವುದು ಮೂಜಗಕೆ ||
ರಂಜಿಪ ಮಣಿಯ ಸಿಂಹಾಸನದ ಮೇಲಿಪ್ಪ |
ಕುಂಜರವರದಾದಿಕೇಶವ ತಾ ಬಲ್ಲ ||೩||