ರಾಗ — ಮೋಹನ
ತಾಳ — ಅಟ್ಟ
ಆರು ಬಾಳಿದರೇನು ಆರು ಬದುಕಿದರೇನು |
ನಾರಾಯಣನ ಸ್ಮರಣೆ ನಮಗಿಲ್ಲದನಕ ||ಪ||
ಉಣ್ಣಬರದವರಲ್ಲಿ ಊರೂಟವಾದರೆ ಏನು |
ಹಣ್ಣು ಬಿಡದ ಮರಗಳು ಹಾಳಾದರೇನು ||
ಕಣ್ಣಿಲದವಗಿನ್ನು ಕನ್ನಡಿಯಿದ್ದು ಫಲವೇನು |
ಪುಣ್ಯವಿಲ್ಲದವನ ಪ್ರೌಢಿಮೆ ಮೆರೆದರೇನು? ||೧||
ಅಕ್ಕರಿಲ್ಲದವಗೆ ಮಕ್ಕಳಿದ್ದು ಫಲವೇನು |
ಹೊಕ್ಕು ನಡೆಯದ ನಂಟತನದೊಳೇನು ||
ರೊಕ್ಕವಿಲ್ಲದವಗೆ ಬಂಧುಗಳಿದ್ದರೇನು |
ಮರ್ಕಟನ ಕೈಯೊಳಗೆ ಮಾಣಿಕ್ಯವಿದ್ದರೇನು ||೨||
ಅಲ್ಪ ದೊರೆಗಳ ಜೀತ ಎಷ್ಟು ಮಾಡಿದರೇನು |
ಬಲ್ಪಂಥವಿಲ್ಲದವನ ಬಾಳ್ವೆಯೇನು ||
ಕಲ್ಪಕಲ್ಪಿತ ಕಾಗಿನೆಲೆಯಾದಿಕೇಶವನ |
ಅಲ್ಪವೂ ನೆನೆಯದ ನರನಿದ್ದರೇನು? ||೩||
*****